Sáhttágo váidalit gildii?
Gielda ii leat formálalaš klageinstans (váidalanásahus) givssidanáššiin, muhto sáhttá goitge árvvoštallat váidalit gildii.
Gieldda politihkalaš ja hálddahuslaš jođiheamis lea beroštupmi das ahte skuvllain lea buorre oahppanbiras:
-
Gielda lea gieldda almmolaš mánáidskuvllaid ja nuoraidskuvllaid eaiggát, ja sáhttá oažžut sáhkuid jos oahppanbiras ii leat lága gáibádusaid mielde.
-
Gieldda politihkkárat leat válljejuvvon fuolahit gieldda ássiid, dás maiddái mánáid vuoigatvuođa oadjebas skuvlavázzimii.
-
Politihkkárat ja gieldda hálddahus beroštit das ahte gielda orru positiivvalaš olggos guvlui, ja hárve háliidit ahte gielda oidno givssidanáššiid oktavuođas.
Muhtun gielddain leat sierra áittardeaddjit, «trygg-kontakter» (oadjebasvuođa-oktavuođaolbmot) ja fágaidrasttildeaddji joavkkut mat sáhttet veahkehit givssidanáššiin. Smávva gielddain dáhpáhuvvá ahte skuvlla jođiheamis lea lagas oktavuohta olbmuiguin geain leat guovddáš virggit gieldda hálddahusas, politihkas ja justiisavuogádagas. Dat sáhttá dagahit ahte givssidanášši šaddá dovddus vuosttažettiin skuvlla perspektiivvas. Bearaš sáhttá áinnas fitnat gieldda ovddasvástideddjiid luhtte duođaštusaiguin givssidanáššis, ja buktit ovdan bearraša vásáhusa. Gielda sáhttá addit eahpeformálalaš deattu skuvlla ektui. Doaivumis dat sáhttá váikkuhit ahte ášši unniduvvo unnit ja ahte dilli ipmirduvvo buorebut, vai heivvolaš doaibmabijut álggahuvvojit ja vejolaš sierraneapmi/stigma eastaduvvo.