Maid sáhttá politiija dahkat?
Kriminála vuolleahki Norggas lea 15 jagi. Veahkaválddi, áitagiid ja digitála givssideami oktavuođas sáhttá nuoraid bidjat ráŋggáštusrievttálaš ovddasvástádussii juo nu nuorra agis, muhto geavatlaččat leat politiijas unnán gaskaoamit nuoraidkriminalitehta vuostá. Politianmeldelse (čálalaš váidalus politiijai vejolaš ráŋggáštahtti dagu birra) sáhttá dattetge doaibmat positiivvalaččat.
Muhtun politiijastašuvnnain leat áššedovdit nuoraid birra geain leat váttisvuođat láhttemiin. Politiija sáhttá doallat duođalaš ságastallama nuoraiguin geat geavahit veahkaválddi ja áitagiid, áinnas ovttas sin fuolaheddjiiguin.
Politiija sáhttá boahtit čoahkkimii skuvlii ja juohkit dieđuid fáttáin mat gullet givssideapmái, áinnas sihke fuolaheddjiide ja ohppiide. Fuolaheaddjit sáhttet ovdamearkka dihte lágidit dakkár čoahkkima, ovttasbargguin luohkkáoktavuođaiguin, FAU:in ja skuvlla jođiheddjiiguin.
Máŋgga politiijastašuvnnas leat beaktilis gaskaoamit digitála givssideami vuostá. Sii sáhttet muhtun dáhpáhusain gávnnahit gii lea “anonyma” kontuid duohken ja mearridit sáhkuid.
Go politiija searvá áššái, de dat deattuha ášši duođalašvuođa, sihke skuvlla, givssideaddji mánáid ja sin bearrašiid ektui.
Loga: Váidaluvvon áššit sáhttet doalvvuduvvot Konfliktrådetii