Når bør du politimelde?
Mange foreldre kvir seg for å blande politiet inn i noko som skjer mellom barn. Nølinga er forståeleg — men rettsvernet til barnet skal ikkje vere svakare enn ditt eige.
Mange kvir seg for å gå til politiet. Foreldre kan tenkje at politiet har andre, og viktigare, oppgåver å bruke ressursane sine på. Ein del mobbesaker inkluderer vald og truslar, og utgjer ein klar helsefare for barnet. Då bør ein vurdere politimelding.
Kontrollspørsmål
Dersom du er i tvil om du skal melde, kan du stille deg følgjande kontrollspørsmål; - Kva ville eg gjort, dersom eg blei utsett for dette?
For mange er svaret opplagt, dei hadde politimeldt trakasseringa/valden. Dersom det er tilfelle, blir eit naturleg oppfølgingsspørsmål; -*skal rettsvernet til barnet mitt vere dårlegare? I så fall kvifor, fordi det er eit barn? *
Spørsmåla er retoriske, men talande. Samfunnet kan i mobbesaker vise ei underleg evne til å godta urett mot barn som ein aldri hadde akseptert mot vaksne. Slik skal det ikkje vere.
Kven kan ein politimelde?
Familien kan politimelde barn som mobbar, føresette til barn som mobbar, skuletilsette som ikkje stoppar mobbing og eigarar av skular der det skjer mobbing.