Velkommen til Foreldreguide

Denne guiden er skriven av Foreningen Mobbing i Skolen (Fomis) for deg som ønskjer informasjon om korleis du kan gå fram for å stoppe mobbing av barn i skulen. Vi er ei ideell, tverrpolitisk, demokratisk og landsdekkjande foreining som bistår familiar i mobbesaker. Vi jobbar aktivt politisk for å få til ein vesentleg og varig nedgang i mobbinga.

Gjennom det frivillige arbeidet vårt har vi fått brei erfaring med mobbesaker. Vi veit kor tøft det kan vere og korleis ein kan hjelpe barnet vidare. Vi ønskjer å dele erfaringane våre med deg, slik at du står betre rusta i møte med skulen.

Denne guiden hadde ikkje vore mogleg utan støttespelarane våre

Ein stor takk går til Akershus Fylkeskommune

Ein stor takk går til sponsoren vår NettSkred, som har utvikla denne guiden.

NettSkred utviklar moderne nettsider og appar, og har ekspertise på tryggleik. Referer til Foreldreguide og få 15% rabatt!

Råda våre blir brukte på eige ansvar

Vi er foreldre, som deg, og er ikkje fagfolk eller ekspertar. Denne guiden er resultatet av år med erfaring med mobbesaker, men det er du som kjenner barnet ditt best og tek dei beste avgjerdene. Kva du vel å gjere, er ditt ansvar. Du kjenner barnet ditt best, og må sjølv vurdere om råda passar for dykk. Mobbing kan representere alvorleg helsefare — står helsa til barnet på spel, må du søkje profesjonell hjelp.

Kva gjer denne guiden annleis?

Det finst mange råd mot mobbing, men det er få som kjem frå familien si side. Vi er stemma til foreldra. Vi veit kor åleine ein kan stå, dersom skulen ikkje tek tak i problema. Det burde vore enkelt å sikre barnet sitt trygg og god skulegang, i staden kan ein oppleve motstand både frå skule, kommune og nærmiljøet. Korleis kan ein gå fram for å unngå det? Korleis kan ein gå fram for å overvinne det? Moglege løysingar vil du finne i denne guiden.

Spør alltid; - vil barnet få det betre?

Det er lett å tenkje at alt vi gjer er til det beste for barnet. Få ting kan vere meir opprivande enn når ein ser at barnet lir, særleg dersom det ikkje hjelper å seie frå. I nokre tilfelle kan det bli verre etter at ein har varsla skulen. Då er det naturleg å bli sint og søkje rettferd. Før du aksjonerer, ber vi deg stille deg spørsmålet; - vil det eg gjer no bidra til at barnet får det betre?

Første prioritet er å redde barnet ut av ein mobbesituasjon. Deretter kan ein forsøkje å forbetre systema, dersom ein ønskjer det.

Vi tilrår å lese heile guiden

Det kan ta tid å løyse ein mobbesituasjon. Vi tilrår å lage ein plan som inneheld ulike verkemiddel. Verkar ikkje plan A, gå vidare til plan B, og nokre tiltak verkar godt i samspel. Vi tilrår derfor å lese gjennom guiden, slik at du kjenner til dei ulike verkemidla du har til rådvelde.

Jobb med saka til du ser at barnet er på rett spor. Følg opp og sjå at det nye sporet blir varig. Å hjelpe barnet ut av ein situasjon, der sjølvtilliten smeltar som snø i ørkenen, til å sjå barnet rette ryggen og gå ut i verda med venner og ny sjølvtillit, er ei gåve utan like.

God lesing og lukke til!

Les: Kva er mobbing?